زمان و انا قلبى حنين
وموتور دماغى بيليـّن
صدقت إنى مش بشتغلنى
وان الطريق مفتوح وهين

تلاتين سنه طالع نازل
على كل سلم بتنازل
عن حاجه حلوه ف كيانى
لحد ما بنوا لى العازل

تلاتين سنه من عمرى الحى
عمر الأمانى وعمر الضى
راحوا ف عمايا
والجوع ورايا
خبوا الضحايا البُبـُع جى

على بطنى رابط حزاماتى
مدايننى حتى الجزماتى
بعت الكنب الاسطمبولى
وعايشها فـُلى حلمبولى
أنا وعيالى و مراتى

تلاتين سنه بمشى على السلك
و الوحش ساكن بيتى الملك
وحش ابن هرمه
دماغه صرمه
حاطط بيـ..انه ف بودرة تلك

أحشّ غيطى وازغط فيه
تخن قوى ومبقتش اكفيه
ده غير بقى جيش ألاضيشه
وبجيبله بيرته و حشيشه
وبت جارتى بتدفيه

عرررضنى لمواقف وحشه
وكمان قليط ابن الجحشه
ومن ضرايبى بيتشيك
وانا من قرايبه بتحيـّك
حوحو كده ومن غير فرشه

بيَّعنى أرضى و مفهومى
قلعنى فكرى وهدومى
مخى اتقفل فيلم على كليب
ولما يفتح يشرب كدب
ما انا أصلى أهبل من يومى

مسحوا لى من بـُقى اللأه
ظبطونى بين شخطه و زقه
والوحش زقلط بقى باشا
يفطر بدمى على بغاشه
وادعى له يعلى و يترقى

ما انا البعيد اللى استاهل
آخد خازوق كده ع الماهل
تلاتين سنه غارز بارز
مالوش منازع و مبارز
والشعب طيب على جاهل

وحياة حلاوة زنازينكم
والفقريار اللى حازنكم
أنا مش غبى وجبان وحمار
واستاهل الوحش الجبار
يهينـّى و يطلع دينكم ؟

ما تزعلوش قوى كده فيه إيه؟
ما قال بلاوى ما ردوا عليه
نحل وبركم
وكل عبوركم
وجاب خبركم عملتوا ايه ؟

أنا وانتوا و العُصبه السوده
حطاه بارومه و فسوده
لو كان فيه خير كان هل و بان
شرم برم حالى تعبان
عقده بشنيطه ومعقوده

يا أخ يا جميل يا مثقف
حتى انت برضه بتتأفأف
أفلا ترى الوحش ف دارنا
يا عم ركز و احضرنا
نعش احتضارنا بيتأيف

صناعه حتى الولاعه
بنجيبها م الصين يا جماعه
وتجاره أولها خساره
وزراعه بارت وإداره
ذمتها واسعه و متباعه

وسجون وقمع و معتقلات
وعيش مفيش لو تقدر هات
وطابور عواطليه وعزاب
عايشين ف غربه وف استغراب
ومقضينها كافتيريات

ملايين بقى فضائيه ونت
تشت ولا حاجه بتـنبت
ساكتين فشر دول شعب اللك
عاملين بشر قابلين العك
راجل وست وشب و بت

كلنا كده ف الهم سواء
من غير لماضه ولا استعلاء
عملنا م البحر طحينه
سبناه بيلعب ف الطينه
حدفنا بالفصحى بخراء

يا أيها الشعب المفشوخ
يا ابو النفوخ الدربندوخ
مش آن بقى تفوّق سنه
لا ف الأثر ولا ف السنه
تعيش غبى و تموت منفوخ

مضمض عيونك بتاريخك
واقرى اللى كاتبينه شيوخك
ماتخافش م الوحش ده خيخه
كبير كبيرهم بطيخه
ليه تسيبه يلهط بطروخك

كفايه دوله هس و شيى
حماركو مش عاوز يمشى
وبكره يحرُن و يرفـّس
وتيجى تركب تتفعّص
حمار بقى و ما بيفهمشى

وانت اللى ربيته ف خوفك
لو طال هياكلك من جوفك
سيبه بقى و اركب مراجيح
بفلوسك اللى ف بنك الريح
وده يبقى آخر معروفك

مش لازم الجيل التالى
أرجوك بقى تسيبوا عيالى
يمكن يحبوا النيل و الأرض
وفوق ترابها يصلوا الفرض
إفهم بقى ياللى ف بالى