من سجن طره.. إلى عبير العسكري:
لقيتك أنتي والبنات نازلين ومُصرين، انكسفت وفوقت.

"أنا أستشهدت قبل كده تلات مرات" وضحكت، يوم 1 مايو كان مزاجك رايق ونازلة تريقة علينا وعلى الحركة والحكومة وعلى نفسك. "قال أبعت هاتلنا 100 عربية واحنا مش قادرين على اتنين" و"بكرة اللى بقالنا سنين مستنينه مع أن عمر القهر ما يقدر يأخره".

أقولك ايه بس والواحد مكسوف من نفسه، اتلميت في قبضة هبلة ما تستاهلش وقاعد فى الحبس أشمشم على أخبار عن يوم الخميس، كل ما أسمع عن ضرب أو مظاهرة أفرح علشان لما حاجة بتحصل، علشان الضغط ممكن يطلعنا بدري وعلشان كده حبسي له لازمة. لحد ما جه يوم الحد ووصلت الجرايد، قعدت أتفرج على الصور بسعادة ونشوة لما أشوف الضرب باين ازاي، الصور دي هتولع الدنيا.

كل اللي في بالي ردود الفعل للتغطية الأعلامية، جه المغرب ورجعنا الزنزانة وأبتديت أقرأ مش بس أتفرج على الصور وقتها بس اللي أخدت بالي أن الضرب ده كان يشمل ناس أعرفهم وأحبهم وأحترمهم. وقريت عن اللي جرالك.

هقولك ايه بس؟! أستشهدتي للمرة الرابعة ؟ عمري ما اتعرضت لربع اللي شفتيه ومقدرش أتخيل نفسي مستحمل ده كله.

يوم 25 مايو السنه اللي فاتت خدت علقة صغيرة وانزعجت وقلت محناش نازلين تاني، وبعدين لقيتك أنتي وباقي البنات نازلين ومُصرين وانكسفت من نفسي وفوقت. في دماغي صورة ليكي وأنتي بتهتفي فى مظاهرة ودراعك في جبيرة، وفي ودني صوتك وأنت بتسألي على صور وليد الدسوقي، يا ترى ده تمن مقال وليد الدسوقي ولا تمن مقال تاني ولا تمن أنك عبير العسكري.

هقولك ايه بس، بكرة أحلى!!! أنا عارف أنك مثال لمناضلي جيلنا منتيش مستنية أمل ببكرة عشان تنزلي وتتكلمي، أحنا لا عندنا أمل ولا حتى عندنا يأس، أحنا أحنا ودي عيشنا.

هقولك سلامتك ؟! يخرب بيتك يا بت تلاقيكي مكسرة الدنيا.

هقولك أجمدي وأصمدي؟؟ يا سلام وأنا اللي قاعد هنا مرعوب ينقلوني زنزانة أسوأ أو يقطعوا عني الزيارات. هقولك ليهم يوم ؟! يا خوفي أحفادنا ما يشوفوا اليوم ده مش أحنا وبس.

 مش هقولك غير أشوفك قريب ويمكن المرة الجاية يكون نصيبي ابقى معاكي لما تستشهدي للمرة الخامسة.

مدونة علاء ومنال:
http://www.manalaa.net/from_alaa_to_abeer