أولا لازم نعترف أن التنظيم مكانش كويس، و ده مش خطأ صاحب المبادرة لأنه عمل اللي يقدر عليه، التقصير كان من الآخرين اللي عجبتهم الفكرة و معملوش حاجة (و أنا أولهم)، كان مفروض ناس تبذل مجهود في الاتصال بالحركات و الكيانات السياسية، كان مفروض ماس تبذل مجهود في الاتصال بالاعلام و كان مفروض ناس تبذل مجهود في نشر الدعوة بشكل أوسع من كده بكتير. الدعاية على المدونات فقط مش كفاية. آسفين يا جماعة على التقصير.

الفكرة

في رأيي كانت صحيحة تماما، رغم خطورتها (و اللي نزل النهاردة و شاف منظر العساكر واقفة ببنادق و قوات خاصة مطرح فرق البلطجية اللي اتعودنا عليها يقدر مدى الخطورة). أحنا في حالة تضييق اليومين دول و فيه حالة خوف كمان، مظاهرة مناهضة التعذيب اللي السنة اللي فاتت كنت في لاظوغلي و كبيرة السنة دي اتعملت قدام قسم السيدة زينب و حضرها أقل من 15 متظاهر، الناس مرعوبة فعلا.

لكن الصح في لحظة زي دي هو أنك تصعد، متسمحلهمش أنهم يخسرونا المساحة اللي كسبناها السنة اللي فاتت، و تكسر الخوف بأنك تواجهه، بأنك تنزل و أنت مستعد تتعذب و تتحبس و تنضرب و تنفعص لحد ما هما اللي يزهقوا (ده اذا حصل و زهقوا يعني). الفكرة كانت صح، و المكان صح، لكن كانت محتاجة حشد أكبر. في الآخر أي مظاهرة ممكن تفشل طالما أننا مش ألاف مؤلفة، يوم 1 مايو كان عدد مش بطال و عرفوا يحجمونا تماما. على فكرة ناس كتير نزلت النهاردة بس مقدرتش تتجمع و ناس كتير كانت متابعة بالتليفون و مستعدة تنزل، بلاش حد يلوم التاني و يقوله أنت نزلت و أنت تخاذلت ملوش لازمة الكلام ده.

معلش يا أسد المرة الجاية تكون أفضل